عدنا والعود أحمد

 

السلام عليكم ورحمة الله وبركاته

أهلا بأخوتي من كل مكان يسعدني اني رجعت

واعذروني على الغيبه لاني مريت بظروف صعبه , هذا غير اني مرضت ( الحمدالله على كل حال )

 اما الآن انا في أحسن حالاتي واتمنى من العلي القدير ان أقدر أفيدكم وامتعكم بكل ماهو جميل

وأشكر كل من سمح له وقته ان يزور مدونتي ويسأل عن سبب غيابي سواء هنا او عبرالمنتدى الذي دائما أشارك فيه بافكاري

http://www.mexat.com/vb/member.php?find=lastposter&t=451159

 

 

واقول لكم جميعا الله يحفظكم ويعطيكم الصحة والعافيه

 

وانتظروني قريباً بمشيئة الرحمن 

 

 

في اماان الله

 

رسومات في منتهى الروعه

رسومات أعجبتني جدا فأحببت ان انقل لكم ماشاهدته

أرجو لكم مشاهدة ممتعة

 

الجزء الثاني والأخير(عادات أهل مكة قديماً).

 

هذا الصندوق الذي كان يوضع فيه دبش العروس (ملابسها واغراضها)

هنا ليلة الغمرة التي فيها العروس تتحنا

هنا العروس لا يرى  وجهها عشان لا تروح طلتها زي مايقولوا

هذه نموذج معين من الستارة التي توضع فيها العروس عشان تتخبى من الانظار

الدبش

عبارة عن ملابس  العروسة يودوه لبيت الزوجية  يرصو الحوايج والشغلات الباقية , طبعا اللي يروح ام العروسة واختها الكبيرة و خالتها عمتها يعني الشغلة محسوبة حق 5او 7 او 9والحريم مو زي دحين كأنهم رايحين تمشية كل بنت تبغى تروح طيب اذا البنات كتيرين تبارك الرحمن مو حلوة تجتمعوا كلكم بربطة المعلم وتروحو , ومن معتقدات زمان  كانوا الحريم يقولوا اللي يدعس اول واحد على رجل التاني ينشكم (تضعف شخصيته )ومالو كلمة بعد كدة والراجل لازم يفقع رأس بسة (يقطع رأس قطة ) ولو كانت عري (قط ذكر متوحش) يكون احسن تسيرالحرمة تتوهور وتنفجع (تخاف) من جوزها , البنات اللي على وش جواز يقرصو العروصة في ركبتها او فخدها يسير يتجوزو على طووول (من باب التفاؤل)

الرفد

نوع من الهدية او المساعدة يقدموه الناس والجيران والاحباب للعريس يسير يعاونوه (من أجل المساعدة والمحبة ) وتلاقي الناس تقدم الرفد للعريس اللي يجيب فلوسواللي يجيب ارزاق واللي يجيب طليان ( خروف جمعها خرفان ) واللي يجيب مقاضي (مواد غذائية ) واللي يجيب ملابس , ماشاء الله الناس كلها تجيب وتكثر الرفودة  لدرجة  يحطوها في الحوش في بيت من بيوت الجيران يسير يستعملها العريس بعد كذا  , من جد كانوا رجااااااال يساعدو كل واحد ينوي الجواز ويهمهم يسترو الشباب والبنات والله لو استمر احوال زمان في هادي الايام كان مابقي ولاعانس في البيوت وكلو توفيق بأمر الله ومايشيلو هم شي كل مين يفزع للتاني من غير مقابل كلهم يدورو الاجر من الله عز وجل وعلى قولة سوي طيب وارمي في البحر واللي يقدم السبت يلاقي الاحد

قطع الستارة

قبل الفرح بسبعة أيام كان في يوم اسمه  قطع الستارة والستارة هادي كانوا يستأجروها مطرزة بالترتر والدنتيل وهادي ينصبوها وتجلس وراها العروسة وبعدين يمسكوا العروسة بعدما يجروا وراها من مكان لمكان الين يمسكوها ويحطوها ورا هادي الستارة (يعني مطاردة ورى العروس في انحاء المنزل ), وتجلس العروسة فيها فوق طوراحة مشتغلة وخداديات مشتغلة ومطرزة ولايقة باسم عروسته (اسمها مطرز على المرتبة والخداديات وكمان على الستارة) وخلال دي السبعة الأيام يكونوا اهلها وحبايبها داخلين نادرين عليها بالأكل عشان تتغذى الين ما تصير خدودها زي التفاحة من كفتة ومسلوقة , لبيض مسلوق , وفاكهة وعصيرات أشكال والوان ومن دي الحاجات اللي ربنا يقدرهم عليها وكمان أهلها وقرايبها اللي حضروا قطع الستارة كل وحدة تشتغل الشغلانة اللي ربنا يقدرها عليها مافي وحدة تقعد فاضية ولا تتمنظر  , منهم مين تساعد ام العروسة  ومنهم اللي تفصل  وتخيط ملابس العروسه ومنهم اللي تحنيها (الحناء ) ومنهم اللي تطبخ وتباشر الضيوف الموجودين, ومنهم اللي يستعدوا بترتيب نصبة الشاهي واللي تكوي الملابس وترتبها في الشنط حقت العروسة عشان لمن يودوها يدبشوها على بيت العريس , ومنهم اللي تهتم ببشرة العروسة : كانوا يحطولها النشا بماء الورد على وجها , وكمان يطحنون الفخار  ويحطوه على وشها بعد ما يعجنوه بالموية و عليها بالمشقرة من أجل تنظيف الوجه ( حركات يا اهل اول والله مو زي دحين الله يخلي الكوفيرات والمقينات ) وأصلا اهل اول في دي الايام السبعة ما يتكلفوا داك الشي كل شيء ببساطة , كان يجيهم الخير من الأهل والجيران خلال دي الأيام , بس اللهم الطباخ اللي يجلس عندهم هادا الأسبوع يطبخ بكل اللي يرسلوه الحبايب من دبايح واكياس رز حاجات من دا اللي يتسوا في الافراح والولايم , وكانت العروسة ما تبان وهيا ورا الستارة , مايسير احد يشوفها الا وهيا متلتمة (متخفية عن الأنظار وتضع اللثام على وجهها ) مايبان منها غير عيونها !!! تعرفوا ليش؟؟؟ علشان لا تروح طلعتها وكمان من باب انو محد يشوفها الين ما يجي عريسها يوم الفرح  ويكون اول واحد داك اليوم يشوفها ( ياعيني على هالحركات ) 

الغمرة او ليلة الحنا

وهادي الشغلات تسير قبل الفرح بأسبوع من ضمن حاجات الغمرة هادي خاصة بالحريم , قبل الجواز باسبوع يتجمعوا  الاهلية القريبين ويمسكو العروسة يحنوها اما  اللبس حق الغمرة مالو نوع معين بس اللبس الهندي او البنجابي كان منتشر ويغطو وجه العروسة  عشان لاتروح طلتها  ويتحنو الاهلية واذا زادت  من الحناء شيء  يقرطسوها (يغلفوها بالنايلون) ويوزعوها للموجودين وبعدها تبدأ الغطرفة ( الزغاريد)  والاغاني , وبعدين يتناولون العشاء  ويسموها العشوة بالتعتيمة ( شريك , كعك , جبن بلدي , زيتون , أمبة (ايدام هندي بالمانجا) , حلاوة ,  مخلل قرن فلفل نص ليمون فحل بصل ) طبعا كل واحد  له حركات وطقوس وعادات في ليلة الغمرة منها مثلا يجيبو تفاحة ويشقروها ( قطعها من المنتصف ) ويحطو جوتها ريال فضة , ويعلقوها زي السلسة في رقبة العروسة

وخداديات مشتغله 

عارفين الخدادية هي المخدة , كانت الخدادية من القطن والنوع المزبوط مخلوطة بريش الطيور وتلاقوها نااااااااعمة ولينة زي خدود البنات , ومن هنا يقولوا جاء الاسم خديات ( خدود البنات )

ومنهم من يستعد بنصبه الشاهي

نصبة الشاهي هو المكان اللي يسوو فيه الشاهي , والنصبة دولاب خشب  مزخرف منقرش اشكاااال وألوان ينحط جوتو فناجين الشاهي والبراريد والتلقيمة والموية الفايرة (الحارة لدرجة الغليان)

القهوجي

طبعا معروف هو اللي يهتم بالمشروبات شاهي بانواعه وغير القهوة و يجي بالعدة حقتو براريد وفناجين وبنت المنقل ( الكانون ) اللي يوضع فيه الفحم المشتعل , وايضا كيس فحم ,  كمان شاهي الفحم لاتدل عدوك عليه , لان الشاهي اللي يطبخ على الفحم طعمه مرة جناااان  , المهم يتواعدوا مع  القهوجي من العصر عشان يحجز  مكان مزبوط  في الفرح ويبدأ يسوي الشاهي والقهوة الى  اخر الزواج  وهو ماشاء الله براد رايح وبراد جاي

موعد الزواج

الاغلب والمعروف في الليل من بعد العصرية يجتمعو الاهلية الى بعد العشاء ماتجي  الساعة 11 او  12 الا الزواج منتهي  , وفي ناس كانوا يعملوه  قيلة في الظهر يعني غدوة على السريع تقريبا من الضحى على الساعة 10 يجتمعو الى الظهر يصلوا  ويتغدو ويجلسوا الى العصرية وكلواحد على بيته وهادا النوع اللي يسموه زواج  البدو لانهم دايما يعملون  افراحهم في النهار اما  اهل الحارة مايبغالهم عزيمة مو خلاص كل أهل الحارة زي يالأهل فما يحتاجوا يجي واحد ويقلهم تعالوا سوو وافعلو , ماشاء الله كانوا أهل واجب وتوجيب مايستنو حمدا ولا شكرا , والناس البعيدين شوية يرسلولهم كروت الفرح  وكانت اوراق تنكتب باليد يشوفو احسن واحد في الخط (يعني خطه جميل في الكتابه ) مو زي دحين الكروت اشكال وألوان وفي كروت توصل الى 500 ريال  للكرت الواحد فقط واكتر والمصيبة اخرتها تترمي في القمايم الله يعزكم

الفرح

طبعا التحضيرات قلناها فوق اما الآن نجي لوقت الاكل ماشاء الله عليهم كانوا يطبخون  قدر العربي او السليق اذا كان الجو بااارد , او زربيان والا كابلي مع السمبوسك والطرمبة شي يفتح النفس طبعا يجي الطباخ بنفسو ويجيب العدة معاه ويجلس يطبخ على الحطب والفحم وتحسو الاكل ريحتو فاااااايحة تشهون اللي ما يتشهون النفس طيبة واللقمة هنية والقلوب على بعضها (الله الله على هالقلوب النظيفة ) , واذا زاد شوية اكل يلموه في اكياس او صحون ويعطو لجيرانهم البعيدين واللي ماقدرو يحضرو الفرح  أويروحوا جهة  الحرم  المكي ويتصدقوا  بيه على الفقراء , بعد العشا يجي عاد الفرح والصهللة بالمزماااااار والاغاني والرقص  الى الساعة 4ونص 5 عربي يعني  يوافق الساعة 12 ليلا

النصــــــــــــــة (الزفة والجلوس على الكوشة )

ولمن تتنص العروسة على عريسها كان مرة عيب عليها انها تفتح عينها وتطالع في أحد ان كان ستا ت ولا حتى ان كان العريس لا بعدين يقولوا عليها جريئة ووقحة وما تستحي ومن دا الكلام 
تعالوا اسمعوا يا بنات اليوم فين الحيا بس ؟؟؟ سارت البنت يالطيف عينها قويه وسار الرجال هو اللي يخجل (كل شيء سار العكس في هذا الجيل )
وكمان كانت في حركة حلوة يسووها اهل اول وهي انهم لمن تتنص العروسة ينصوا معاها وحدة بنت صغيرة لابسة زيها بالظبط بس على مصغر يشرعوها  ( فستان الفرح ) كمان زي ما يشرعوا للعروسة ويسوولها حركات زي حقت العروسة  , و دي الحركة ساروا بيرجعولها كتير من اهل دحين , العريس كان اول ما يشوف عروسته  إلا  في ديك الليلة وهي ليلة الفرح  يسلم عليها ويحط يدو على راسها ويقرا الفاتحة بنية ان الله يهديها له وتكون زوجته زوجة مطيعة وصالحة (  ياسلام بداية طيبة, ويعطيهم ربي على قدر نيتهم  )
كانت الزفات مافي غير الصلواتية  ( مسمى فرقة ), وفي اللعابات اللي مشهورين كل وحدة بزفتها ( المطربه او المغنية )
كانت العروسة لما  تروح لبيت العريس قبل لا تصل  عتبة الدار ( دار العريس ) يكونوا طبعا  اهل العريس مبللين عقد لؤلؤ في ماء  ويقوم العريس بسلامته ياخد هذا الماء  ويصبها على رجلها بالبركة  , من باب التفاؤل عشان يكون قدومها _ لما تدخل على البيت _ يعني انو رجلها باردة على البيت.. ومن دا الكلام

الصبحــــــــــــــــة

الصبحة : هي تاني يوم بعد الدخلة ويعملوها في  بيت العريس
في الصبح تقوم العروسة تتزين  وتنزل وتصبّح على أبوه _ أبو جوزها _ وتصبح على أهله  ويقدموا التصبيحة للعروسة
وتكون التصبيحة مقدّمة من أبوه وأمه وأخواته وكل مين يحب انو يشارك أو انو يكون لهم جميلة عليها , وكمان بيت اهل العروسة يكونوا مستعدين من قبل بتصبيحة لأبو العريس وأخوان العريس وممكن عمو وخيلانو .. يعني اللي يقدم تصبيحة للعروسة من أهله كمان يقدموا  لاهلها تصبيحة , التصبيحة حقت اهل العريس للعروسة عبارة عن دهب أو الماس _ حسب حالتهم المادية او اللي ربنا يقدرهم عليه _ ومجوهرات وعطورات وبخورات التصبيحة حقت أهل العروسة لأهل العريس عبارة عن بقش كل بقشة فيها قطعة توب مصلح وسروال مشتغل وكوفية وغترة وبعضهم يحطوا مشلح ومنديل _ على حسب مستوى العيلة  وفي الليل أهل العريس يستعدوا لضيوفهم عشان  يشوفوا عروستهم الجديدة  , وتتسمى هادي الليلة كمان بليلة أهل العريس

بعد الفرح 

 العروسة كانت بعد الفرح ما يسير تخرج من بيت زوجها ولا تسوي زيارات قبل سنة من زواجها , عيب انها تخرج قبل السنة لحد ان بعض الأحيان ما تخرج إلا وبزورتها في ايدها !!! وأول بيت تتعزم فيه  العروسة بعد هذه  السنة لازم يعملوا لها  عزيمة مرتبة وكبيرة على  قدر خرجتها بعد السنة   ودي العزيمة كانت تتسمى (  بداية )
البداية هي اول عزيمة تروحها العروسة بعد ما تخرج من بيت زوجها لما تتزوج .

النـهــــــــــــــــــــــــــــــــــــايــــــــة

عقبال كل العزاب يارب

في اماان الله

الجزء الأول (عادات أهل مكة قديماً).

قال تعالى

( انـّا خلقناكم من ذكر وأنثى وجعلناكم شعوبا وقبائل لتعارفوا )

لكل شعب عاداته وتقاليده التي اعتاد عليها ومن باب “معرفة الثقافة والاستمتاع بالفنون ” والذي هوأحد أهداف مدونتي المتواضعة
أحببت ان اشارككم معرفة احدى العادات القديمة التي كانت موجودة قديماً في مكة الحبيبة 

 التي انقرضت معظمها الان بسبب التقليعات التي اتت الينا من الغرب

بداية سأتحدث عن طريقة حفلة الزواج (الفرح ) وهذا طبعا قبل اربعين سنة على الاقل

وفضلت ان ارويها لكم يااحبتي  بالفاظ حجازية عشان تاخذوا فكرة عن اللهجة

من البداية

 اذا الولد كبر وصار راجل يعتمد عليه على طول يحاولوا يسعولوا في الجواز
وحتى البنت متى ما ادركت وفزت وصارت ست بيت يجوزوهاالمهم الاب يحاول يذكر كل الاقارب والاصحاب والاحباب انو  عندو بنت على وش جواز
او يكلم العمدة يسير يطبخوا الهرجة سوا

الملكة ( عقد النكاح )

واذا صار النصيب وتمم الله على خير يجتمع الاب واقارب الولد وابو العروسة واقاربها وينزلوا للحرم المكي  ويملكوا ويشربوا الزمزم
بنية التوفيق وبعدين يرجعو للبيت ويسوولهم عشوة خفيفة
واذا سوو الملكة في البيت يجتمعوا بعد قراية الفاتحة ويوزعوا حلاوة الملكة وشربيت ( عصير ) غالبا يكون توت او مشكل
يجيبو حلاوة لومنية لوزية بتاسة عسلية اي ( طاسه ) واحيانا يقدمو حلاوة  لدو وحلاوة  لبنية ويجيبو شريك او كعك سحيرة منو حلاوة ملكة ومنو
عشوة او تلبيبة قبل العشا وقبل الشغل التقيل

حلاوة الملكة

وحلاوة الملكة كل بيت يتفنن في تزينها ناس تسويلها شرايط دنتيلة وناس تسويلها كرانيش وناس تخيطها بخيوط حرير
زي الطربوش يعني كل واحد يزين على قد ما يقدر وشوفو كيف سبحان الله اتغيرت الدنيا والحلاويات صارت اشكال وألوان في الرخيص وفي الغالي والفاااحش في السعر وسارت الشغلة كلها منظرة وفشخرة يالطييييف مع انو حلاوة الملكة زي الرمز تعبير عن الفرح ويسير الناس تدري والله فلان شبك فلانة

 

علبة المهر

علبة المهر اللي يقدموه لأهل العروس علبة خشب قد المصحف تتلف بقماش مطرز وينحط جوتها المهر
بدل مابقدموه في يدهم زي كأنهم بيعطوهم صدقة والا شحتة  ( والله زمان كان كل الذوق عندهم )

الجسيس  او ( المزهب)

هو فنان يغني بصوته بدون موسيقى  وهي عبارة عن  موشحات وابتهالات ودعوات للعريس والعروسة ويجس هديك المجسات اللي تقشعر البدن وتحرك القلب وخدو ترديدات واهاااااات  وتسمعو الحرايم من ورا الرواشين والخارجة يغطرفو وحتى كمان البنات الصوغار اللي مايعرفو يغطرفو يصرخو ويزعقو مبسوطين علامة على الفرح والترحيب بقدوم العريس لبيت العروسة في موكب كبير يضم العريس وابوه واخوانه واعمامو وخيلانو يعني جماعتو يمشو الين قبل لايوصلو لبيت العروسة
يوقفوا على جمب ويمشو زي الطابور ويجيبو الاتاريك المزينة بالسلاسل والخلاخيل
والمعاشر والبواخر اللي فيها الحلاوة والفوفل واللومنية حلاوة النعناع والهيل والقرنفل وسكر النبات والكولونيا الليمون
وغير كدة المباخر اللي تعبك منها ريحة العودة الاصلية
واللي يشيل الحاجات هادي الاقارب والجيران مو زي دحين يجيبو  عمال قال ايش يستحو يشيلو الاتاريك والمعاشر والبواخر
وهادا سبب انو زي هادي الحاجات بدأت تنقرض وتقل مو زي ماكانت زماااااان
تحضيرات الجواز اي ( الفرح )

مثلا بيت فلان عرفنا انو ولدو اتجوز او بنتو
تلاقو أهل الحارة كلهم زي الاهلية مافي واحد بينهم قليل خاتمة وقصيف مروة كلهم اهل واجب وتكميل وفزييييعة على قد مايقدرهم الله
ويجو لابو العريس ويقولو هادا مفتاح البيت والمقعد ( الغرفة اللي جمب الدهليز في الدور الأرضي
يستقبلوا فيها الاوادم والضيوف اللي يجو على غفلة وبدون موعد ) تحت يدك والتاني يجي ويقله السطوح تحت امرك يا والتالت يقولو هادا مفتاح الحوش حط فيه الرفودة زي الطليان (يعني الخرفان اللي تجي هدية ومساعدة من أجل عشاء الفرح )
وولدكم ولدنا وبنتكم بنتنا وفرحنا واحد مو زي دحين كل مين نفسي نفسي لو الجار يبغى البيت يقله والله معليش
الكهرباء عندي ضعيفة ما تتحمل والا مني فاضي المهم يصرف الجار على اهون سبب
والجواز يا يسووه عند العريس او بيت العروسة
على حسب صغر وكبر البيت وعلى حسب تواجد الاهلية يعني يشوفوا الاكترية فين ويسووه جمبهم يسير يريحوهم من ضرب المشاوير.ولو فرضنا ماكفى البيت اذا في ارض والاحواش جمبهم يزبطوه كمانة زي الملحق يسير يستقبلو فيه بقية المعازيموالحريم والناس الفزيعة تبات عند اهل العروسة او العريس وبعضهم يجيب حوايج معاه للكم اليوم حقت الفزعة مو خلو بالكم الفرح احيانا تلاتة ايام لأسبوع وهما يجهزو ويعبدوا فيه
واهل العريس يعلقو اللمبات من بدري يسير الناس كلها تاخد بالها إنو بيت فلان عندهم جواز أو ملكة
المهم تترش الارضية من الضحى بالموية حتى التراب يهجد وما يطير مع الغبرة
ويفرشو الجلايل  (السجاد ) على الارض ويحطو التيازير على الجدران ويمدو اللمبات في الحارة كلها تسير منورة زي الظهر تبارك الرحمن

 الجزء الثاني ان شاء الله راح تكون عن الاستعدادات الخاصة جدا للعروسين . ( منقول مع التعديل والاضافة )

ملاحظة : هل وجدتم صعوبه في فهم الكلمات ؟

يعني هل عندكم رغبة في ان اكمل موضوعي بالجزء الثاني

 باللهجة الحجازية ام اكتب باللغة العربية الفصحى ؟  ارجوا الاجابة في تعليقاتكم

الى ان نلتقي استودعكم الله .

نظارة شمسية تتغير ألوانها تلقائياً

 

تمكن باحثون من ابتكار نظارات شمسية تستعمل مواد “إلكتروكرومك”، قادرة على تغيير مستوى شفافية أي عدسة، ومن ثم تغيير لونها تلقائياً بحسب حالة الجو أو بحسب لون الثياب التي تلبسها أنت، وذلك عند مرور تيار كهربائي خفيف معد لذلك.
وأشار باحثون في الجمعية الأمريكية للكيمياء، إلى أن هذه النظارة يوجد بها عدسات تغير لونها حسب الرغبة وبسرعة كبيرة جداً، والعامل الأساسي التي تعتمد عليه الفكرة هو وجود مادة “البوليمر” التي لها القدرة على أن تزيد أو تقلل من حدة وتدرجات أي لون، وذلك عند تعرضها لتيار كهربائي، ويتم ذلك عند الضغط على زر صغير في إطار النظارة ليتحول بعدها لون النظارة إلى أحمر أو أخضر أو أزرق أو تدرجات أي لون آخر ترغب في الحصول عليه.
و أوضح الباحثون أن هذا الاختراع قد يساعد على تطوير نفس المواد المستخدمة في النظارة لتطويعها على مجال آخر وهي “النوافذ الذكية” والتي سيكون لها دورا كبيرا في خفض الطاقة عن طريق التحكم في درجة ولون النافذة في الشركات والمنازل. يذكر أن هذه النظارة تستخدم بطارية صغيرة جداً “بطارية الساعات”، وهي قادرة على أن تقوم بتمرير التيار الكهربائي لتغير اللون آلاف المرات من دون توقف

سبحان الله ( عيش كثير تشوف كثير زي مايقولوا )

انا اعتقد لو نزلت هذه النظارات عندنا خاصة في الخليج راح يشترون الناس بالهبل خاصة حواء اللي تحب الفخفخة والزينة الزائدة

انا اعتقد ان النظارة الشمسية المفروض يكون لونها غامق بين الاسود والرمادي والبني والازرق ويختار الانسان اللون اللي يريحه

ولابد الاخذ في الاعتبار فائدة هذه النظارة والوقت المناسب لها

في اماان الله

الرسم بالرمال

رسم على الأيدي

أنا سعيدة جداً

ليلة البارحة رجع أخي من السفر ليقضي إجازته القصيرة بيننا , فهو مازال في السنة التحضيرية للجامعة فهو يتمنى ان يصبح مبرمج في الحاسب  ( يارب حقق امنيته واعطيه الصحة والعافية وارزقه زوجة تسعده وتفهمه ) .

كم أنا معجبه به وبشخصيته الرائعة , عندما قرر ان يدرس مرحلته الجامعية بعيدا عننا بالرغم من قبوله في الجامعة القريبة لنا ، الا ان عائلتي لم تعارض قراره , أذكر عندما سافر كيف تعبت نفسيتي انا بذات , فقلبي معلق به جدا , اصبح البيت ليس له طعم , نعم البركة في عائلتي , فالحمدالله انا وأخوتي بيننا انسجام قوي، واهتماماتنا قريبة من بعض ( ماشاء الله ) هذا من فضل ربي .

اذكر انني بكيت في ذلك اليوم بصمت ( كعادتي طبعاً ) ، لأنني بصراحة افتقده كثيرا, فشخصيته الرائعة ، تجعلني دائما أحب النقاش معه في كل مانشترك به من اهتمامات فهو يحب مشاهدة برامج عمرو خالد وطارق السويدان والجاسم وايضا برامج الصحة النفسية والطاقة وتطوير الذات غير ذلك يحب السينما الأجنبية والفن الأجنبي بحكم اتقانه للإنجليزية ، فهو يحب كل شيء فيه جمال واحساس وقيمة  , وأيضاً كل شيء جديد ومفيد ، بالرغم انه أصغر مني إلا انني  والله لم اشعر بذلك  يوما فرجولته وافكاره واخلاقه جعلته أكبر مني بكــــــــثير .

أعذروني من فرحتي دخلت افكاري في بعضها البعض ، احببت ان أعطيكم نبذة بسيطة عن اخي الحبيب ( الله يحفظه)

 ان نعمة العائلة نعمة كبيرة  جداً ( أحمدالله حمداً كثيراً عليها ) لذا يجب على الوالدين ان يزرعوا الحب بين أولادهم فوالله عندها لو حصلت  اي مشكلة فانها لن تلبث اكثر من ساعة لأن الحب والحنان الذي بينهم كفيل بان يحل مشاكلهم ، ماأجمل ان يكون الشخص قلبه على أخته او اخيه , ومن صفات ذلك الشخص  تجده  يعامل جميع الناس الذين يحبهم في الله بانهم اخوته في حقيقة مشاعره ويدعو الله  لهم بكل قلب صادق ومحب .

 وانا اقول بكل صراحة , عندي مشاعر الأخوة اتجاهكم ، ممكن اصفها بانها مشاعر كبيرة جداً , فانا دائما أدعو الله ان يجمعني بكم في جنة الخلود على الأرآئك متكئين يذكرون نعمة الله وفضله عليهم .

يارب آآآمين

في  اماااان الله .

الرسم على الزجاج

الرسم على الزجاج فن ممتع حيث يحول قطعة زجاج قديمة الى تحفة فنية رائعة ذات قيمة

أذكر ايام الثانوية اخترت قسم الرسم لانه لازم نختار نشاط واحد في هذه المرحلة اما رسم او اقتصاد منزلي او خياطة ، اختكم اختارت بلا تردد الرسم

فكانت معلمة الرسم فنانة بصدق( الله يذكرها بالخير) في احدى مواضيع الرسم طلبت من الطالبات احضار قطعة زجاج او مرايا قديمة

المهم علمتنا كيف نرسم على الزجاج، طبعا انا احضرت مرايا مقاسها تقريبا ( 50 سم × 50 سم ) ورسمت عليها طبيعة ، وفي النهاية  للأسف احتفظت بها المعلمة لمعرض المدرسة ، وكنت زعلانه لأن أمي نفسها تشوف رسمتي على مرآتها , معليش أخذتكم في دوكه

المهم الرسم على الزجاج له ألوان خاصة وتحديد ايضا خاص فيه ، وممكن رسومات من غير تحديد على طول رسم وتلوين

وهناك نوعين من ألوان الزجاج ،ألوان تسمح للضوء بنفاذه وتعكس الألوان الرائعة، وألوان معتمة لا تسمح للضوء بنفاذه .

هذه ألوان تحديد خاصة فقط لزجاج  ويوجد ايضا الاسود والفضي والذهبي

وهذه ايضا ألوان خاصة لزجاج  مختلفة و تستخدم في تلوين الرسومات

هذه طبعا الفرش المفضلة في الرسم على الزجاج باحجام مختلفة

والآن استمتعوا بهذه الصور الرائعة

     

 

في آمــــــــااان الله  .

 

 

ملابس تغسل نفسها ذاتياً !!

إخترع  باحثان كيميائيان من معهد الأنسجة والملابس في جامعة هونغ كونغ التقنية، صناعة أنسجة لا تتسخ، ولا تبلى ، ولا يحتاج الإنسان إلى غسالة ملابس لتنظيفها أصلاً ، لأن نشرها تحت أشعة الشمس يكفي.
وذكر المكتشفان وليد داود وجون زين ان النسيج الجديد مكسو بطبقة رقيقة من الألياف النانوية التي تتفاعل مع ضوء الشمس وتنظف نفسها بنفسها من الاوساخ وتتكون ألياف النسيج من جسيمات نانوية بالغة الصغر من مادة أوكسيد التيتان TiO2 التي تنتظم داخل تكوين كريستالي (بلّوري)، ولا يزيد سمك 2500 من الكريّات جنب بعضها  عن سمك شعرة. ويتميز النسيج البلوري بالقدرة على استخدام اوكسجين الهواء كمسحوق غسيل حالما تسقط أشعة الشمس فوق البنفسجية عليه، وينشأ عن التفاعل نسيج نظيف يطرح عنه بخار ماء وغاز ثاني أوكسيد الكربون.

من جانب آخر أبدى الأطباء مخاوفهم من عدم ثبات المواد المصنوعة من الجسيمات النانوية ومن مهاجمتها لخلايا جسم الإنسان. وقال بيتر جير من معهد التشريح البشري في بيرن في سويسرا أن الجسيمات النانوية (التي لا يزيد قطرها عن بضعة أجزاء من مليون جزء من المليمتر) تبقى لفترة طويلة في الجسم

لكن مازالت الدراسة مستمرة حول هذا الموضوع ياترى لو اكتشفوا فعلا انها ليست مضرة هذه الجزئيات كم شخص سيودع غسالة الملابس ؟؟؟!!

عن نفسي انا مستحيل استغني عن غسالة الملابس ( أيوا غاوية تعب ) فالماء أساس النظافة ، ويشعرالشخص فعلا بأن ملابسه نظيفة، صحيح الغسيل متعب بعض الشيء  ، بس ممكن الشخص يمزج تعبه ببعض الامور التي تخفف عليه تعبه ولو فكر هذا الشخص كيف أيام زمان( ستاتنا) أقصد جداتنا  وهذه كلمة تقال عند بعض أهل الغربية ، كيف كانوا يتعبون كل اشغال البيت على يدهم ، الحمدالله نحن في خير كثير لابد ان لا تجرفنا الصناعات الكيماوية بعيدا عن الصحة فالحياة حلاوتها بتعبها ، صدقوني مستحيل نشعر بحلاوة النتيجة إلا بعد التعب في حصولها ، هذه هي الدنيا خلق الانسان في كبد ، فالراحة الحقيقية والأبدية هي الحياة في الجنة وهذه حقيقة لابد أن يدركها كل إنسان ينشد الراحة ويمقت التعب،أسأل الله العلي القدير الغفور الرحيم أن يجمعني بكم في جنات ونعيم بصحبة خير الأنام اللهم صلي عليه وسلم  .

اللهم آآآمين