الجزء الأول (عادات أهل مكة قديماً).

قال تعالى

( انـّا خلقناكم من ذكر وأنثى وجعلناكم شعوبا وقبائل لتعارفوا )

لكل شعب عاداته وتقاليده التي اعتاد عليها ومن باب “معرفة الثقافة والاستمتاع بالفنون ” والذي هوأحد أهداف مدونتي المتواضعة
أحببت ان اشارككم معرفة احدى العادات القديمة التي كانت موجودة قديماً في مكة الحبيبة

التي انقرضت معظمها الان بسبب التقليعات التي اتت الينا من الغرب

بداية سأتحدث عن طريقة حفلة الزواج (الفرح ) وهذا طبعا قبل اربعين سنة على الاقل

وفضلت ان ارويها لكم يااحبتي  بالفاظ حجازية عشان تاخذوا فكرة عن اللهجة

من البداية

اذا الولد كبر وصار راجل يعتمد عليه على طول يحاولوا يسعولوا في الجواز
وحتى البنت متى ما ادركت وفزت وصارت ست بيت يجوزوهاالمهم الاب يحاول يذكر كل الاقارب والاصحاب والاحباب انو  عندو بنت على وش جواز
او يكلم العمدة يسير يطبخوا الهرجة سوا

الملكة ( عقد النكاح )

واذا صار النصيب وتمم الله على خير يجتمع الاب واقارب الولد وابو العروسة واقاربها وينزلوا للحرم المكي  ويملكوا ويشربوا الزمزم
بنية التوفيق وبعدين يرجعو للبيت ويسوولهم عشوة خفيفة
واذا سوو الملكة في البيت يجتمعوا بعد قراية الفاتحة ويوزعوا حلاوة الملكة وشربيت ( عصير ) غالبا يكون توت او مشكل
يجيبو حلاوة لومنية لوزية بتاسة عسلية اي ( طاسه ) واحيانا يقدمو حلاوة  لدو وحلاوة  لبنية ويجيبو شريك او كعك سحيرة منو حلاوة ملكة ومنو
عشوة او تلبيبة قبل العشا وقبل الشغل التقيل

حلاوة الملكة

وحلاوة الملكة كل بيت يتفنن في تزينها ناس تسويلها شرايط دنتيلة وناس تسويلها كرانيش وناس تخيطها بخيوط حرير
زي الطربوش يعني كل واحد يزين على قد ما يقدر وشوفو كيف سبحان الله اتغيرت الدنيا والحلاويات صارت اشكال وألوان في الرخيص وفي الغالي والفاااحش في السعر وسارت الشغلة كلها منظرة وفشخرة يالطييييف مع انو حلاوة الملكة زي الرمز تعبير عن الفرح ويسير الناس تدري والله فلان شبك فلانة

علبة المهر

علبة المهر اللي يقدموه لأهل العروس علبة خشب قد المصحف تتلف بقماش مطرز وينحط جوتها المهر
بدل مابقدموه في يدهم زي كأنهم بيعطوهم صدقة والا شحتة  ( والله زمان كان كل الذوق عندهم )

الجسيس  او ( المزهب)

هو فنان يغني بصوته بدون موسيقى  وهي عبارة عن  موشحات وابتهالات ودعوات للعريس والعروسة ويجس هديك المجسات اللي تقشعر البدن وتحرك القلب وخدو ترديدات واهاااااات وتسمعو الحرايم من ورا الرواشين والخارجة يغطرفو وحتى كمان البنات الصوغار اللي مايعرفو يغطرفو يصرخو ويزعقو مبسوطين علامة على الفرح والترحيب بقدوم العريس لبيت العروسة في موكب كبير يضم العريس وابوه واخوانه واعمامو وخيلانو يعني جماعتو يمشو الين قبل لايوصلو لبيت العروسة
يوقفوا على جمب ويمشو زي الطابور ويجيبو الاتاريك المزينة بالسلاسل والخلاخيل
والمعاشر والبواخر اللي فيها الحلاوة والفوفل واللومنية حلاوة النعناع والهيل والقرنفل وسكر النبات والكولونيا الليمون
وغير كدة المباخر اللي تعبك منها ريحة العودة الاصلية
واللي يشيل الحاجات هادي الاقارب والجيران مو زي دحين يجيبو  عمال قال ايش يستحو يشيلو الاتاريك والمعاشر والبواخر
وهادا سبب انو زي هادي الحاجات بدأت تنقرض وتقل مو زي ماكانت زماااااان
تحضيرات الجواز اي ( الفرح )

مثلا بيت فلان عرفنا انو ولدو اتجوز او بنتو
تلاقو أهل الحارة كلهم زي الاهلية مافي واحد بينهم قليل خاتمة وقصيف مروة كلهم اهل واجب وتكميل وفزييييعة على قد مايقدرهم الله
ويجو لابو العريس ويقولو هادا مفتاح البيت والمقعد ( الغرفة اللي جمب الدهليز في الدور الأرضي
يستقبلوا فيها الاوادم والضيوف اللي يجو على غفلة وبدون موعد ) تحت يدك والتاني يجي ويقله السطوح تحت امرك يا والتالت يقولو هادا مفتاح الحوش حط فيه الرفودة زي الطليان (يعني الخرفان اللي تجي هدية ومساعدة من أجل عشاء الفرح )
وولدكم ولدنا وبنتكم بنتنا وفرحنا واحد مو زي دحين كل مين نفسي نفسي لو الجار يبغى البيت يقله والله معليش
الكهرباء عندي ضعيفة ما تتحمل والا مني فاضي المهم يصرف الجار على اهون سبب
والجواز يا يسووه عند العريس او بيت العروسة
على حسب صغر وكبر البيت وعلى حسب تواجد الاهلية يعني يشوفوا الاكترية فين ويسووه جمبهم يسير يريحوهم من ضرب المشاوير.ولو فرضنا ماكفى البيت اذا في ارض والاحواش جمبهم يزبطوه كمانة زي الملحق يسير يستقبلو فيه بقية المعازيموالحريم والناس الفزيعة تبات عند اهل العروسة او العريس وبعضهم يجيب حوايج معاه للكم اليوم حقت الفزعة مو خلو بالكم الفرح احيانا تلاتة ايام لأسبوع وهما يجهزو ويعبدوا فيه
واهل العريس يعلقو اللمبات من بدري يسير الناس كلها تاخد بالها إنو بيت فلان عندهم جواز أو ملكة
المهم تترش الارضية من الضحى بالموية حتى التراب يهجد وما يطير مع الغبرة
ويفرشو الجلايل  (السجاد ) على الارض ويحطو التيازير على الجدران ويمدو اللمبات في الحارة كلها تسير منورة زي الظهر تبارك الرحمن

الجزء الثاني ان شاء الله راح تكون عن الاستعدادات الخاصة جدا للعروسين . ( منقول مع التعديل والاضافة )

ملاحظة : هل وجدتم صعوبه في فهم الكلمات ؟

يعني هل عندكم رغبة في ان اكمل موضوعي بالجزء الثاني

باللهجة الحجازية ام اكتب باللغة العربية الفصحى ؟  ارجوا الاجابة في تعليقاتكم

الى ان نلتقي استودعكم الله .

~ بواسطة أسيرة خيالي في مايو 9, 2008.

10 تعليقات to “الجزء الأول (عادات أهل مكة قديماً).”

  1. الكلمات مفهومة

  2. رغم أن بعض العبارات غير مفهومة لكن المعنى العام واضح، ويساعد على استنتاج معنى الكلمات . مثلا: يغطرفو عرفت بعد إنهاء اجملة أن معناها “يزغرتو”.
    على كل حال الموضوع فكرته جيدة و بانتظار الجزء الثاني أيّما كانت اللّهجة.

  3. فهمت عليك أختي ..!

    عاداتكم قريبة منا .. لكن الاحلى أنكم في الحركم تملجون ..!

    كم تسوى هاي؟!

  4. اهلا بأخوي (Gdedouy )

    زيارتك هي الأروع
    الله يعطيك الصحة والعافية .
    *****************************
    أهلا باختي الغالية (هند)

    راح ابسط الكلمات ان شاء الله في الجزء الثاني
    المهم
    انكم اخذتوا فكرة عن اللهجة الحجازية من خلال الجزء الاول
    مشكورة على مرورك يالطيبة.
    *****************************
    أهلين باختي الغالية (DUBAI)

    يشرفني وجودك
    عندنا في مكة عادات رائعة ان شاء الله سأورد بعضها في المواضيع
    القادمة ان شاء الله
    والقادم احلى بتشجيعكم
    في اماان الله .

  5. شكراً على إثراءنا بهذه المعلومات، حتى في أيامنا هذه العادات في الزواج تختلف من منطقة إلى أخرى.

    كملي باللهجة الحجازية 🙂

  6. أهلا باخوي ثامر

    الحمدالله انه مافي احد ينسى هذه العادات الحلوة لان في من يحكيها لنا
    وان شاء الله قريباً ساكمل باللهجة الحجازية بشكل ابسط
    مشكور على الزيارة
    في اماان الله .

  7. كأنني عشت معهم في جو بساطتهم الرائع

    أتمنى إكمال الجزء الثاني، ربما اللغة العربية مع قليل من تدخل اللهجة المحلية سيكون جيدا 🙂

  8. اهلين باخوي عابر سيبل
    سعدت كثيرا بزيارتك
    وكمان اشكرك على رايك الجميل
    بس انا اعتقد لو اكتب باللهجة مع توضيح باللغة العربية لبعض الكلمات الصعبة
    افضل عشان تكون افهم للاخوة العرب
    اللي يترددون على مدونتي وانا سعيدة بهم كثير
    وحابه اعطيهم فكرة عن اللهجة المحلية اللي عندنا .

    في اماان الله .

  9. والله زكرتينا بايام زماااان لمن كنا بزوره..يعطيك العافيه

  10. أهلين بااخي محمد سالم

    سعدت بزيارتك
    ويسرني اني نثرت ذكريات الطفولة لأخوتي الزوار
    ومااجملها من ذكريات

    شكرا لزيارتك
    في امااان الله .

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

 
%d مدونون معجبون بهذه: